|
يا أم طرحة بلون الفل
صليب لابنك فى كل ميدان
فاكرة يا عدرا مصر
لما اتحررت م الاوثان
لما زارها ابنك فى ملء الزمان
صعيبة دلوقت الاحوال
اصعب من اللى كان
وانت ام وحنينة
وعارفة معنى الاحزان
ودايما مبينة
قلب مليان حنان
اسمعى يا امى آخر كلام
لما ام تصحى ما تلاقيش بنتها
ويقولوا ربنا هداها ودا من بختها
والاب يعيش مطاطى
وتسمعى صوته بيهاتى
يا مصر خدتى منى الضنا
ضهرى تحت حملى انحنى
وليه الظلم واشمعنى انا
الواد يروح الكنيسة يوم العيد
يرجع غرقان فى دمه شهيد
ياااااااه
هو الفجر ليه كدة بعيد
يا اللى حليتى الحديد
بلدنا مأسور ... مكسور
مقهور ..
بينه وبين الحرية
الف سور وسور
وامتى يشوف النور
يا ام النور
بلدنا عايش فى القبور
وبيبنى للسادة القصور
ولا عمره فكر يقول لا
ولا عمره فكر يثور
وخايف يقول الحق
وامله بس يموت مستور
يا ام المسيح
الصلاة بقت بتصريح
محرومين من كريالسيون
ممنوعين من التسبيح
املنا فى اربع حيطان
ومكان مريح
لا عاوزين رخام
ولا ميكرفون بيصيح
يا بلد العلم والايمان
العدل على بابك جريح
يا ام طرحة بلون الفل
الشمس بتغير من نورك
يا ست الكل
شعبك حزين مشتاق لظهورك
عايشين الضيقة .. والوطن حريقة
والنار طايلة الكل
غلابة وفين الحل
شفاعتك يا امنا
لما نورك على الكنايس بيطل
بتفتح الجناين
ريحان وفل
يا ست الكل ..
د . ياسر يوسف غبريال
|
