|
أجيب دموع منين
والدمع جف من سنين !
أبكي ولادي ازاي والقلب نار وأنين !
وقبل ما يدبل الجرح يجررحوا نني العين !
هاتوا دموع تبررد جروح القلب
هاتوا دموع تشفي جروح العين !
†
†
†
روحت عزبة الزير
لقيت هناك الغفير
بَدَل ما يحرس بيقتل ولاد الفقير
قولت اشتكيه لشيخ الغفر والعمدة
لقيتهم يلموا الغنايم من بيت الفقير !
†
†
†
شقيت الجلبية السودا وسافرت استغيث بالأمير
قولت الأمير غالي ... وساكن في قصر عالي
لكن يا لهو بالي ... ولون جلبيتي زي ليلي
لقيت نفس الغفير
مهرَّب زكايب ابني الفقير
ايوة المقتول ف عزبة الزير لقصر الأمير !
†
†
†
مع إن دم ولادي على ادين الغفير
ولحم ولادي ف سنان العمدة الكبير
ومع إن عفش ولادي في قصر الإمير
لكن فوق بلادي لسة الحمام بيطير !
وف برج البيت الفاضي فقس الحمام زغاليل !
وجوة شجر أولادي بتزقزق العصافير !
†
†
†
قولت انسى حزني السنة دي
وأقضي العيد مع ولادي
خلعت إسود قديم ... ولبست إسود جديد !
يوم العيد ... في نجع حمادي ... يوم العيد !
لبست إسود من جديد
سبعة يناير ألفين وعشرة
للمرة المليون بعد العشرة !
يوم العيد ألبس اسود من جديد !
يا قلبي لا تحزن مفيش السنة دي عيد
ومالوا لما نلبس جديد يوم العيد ؟!
طبعا نلبس جديد ... وإسود وإسود من جديد !
†
†
†
خلعنا القديم ولبسنا الجديد
نستقبل تهاني الغفير ... وشيخ الغفر والأمير
ومندوب العمدة الكبير !
و ياهنايا بورد أصفر جديد !
كل عيد وانت يا سيدنا الأمير ... والغفير وشيخ الغفر سعيد
متأخذنيش يا أمير ...
مش لاقية دمع جديد
كل سنة وكل شهر دم جديد
كل سنة وكل شهر هم جديد
كل عيد ألبس اسود جديد
ومالوا نلبس اسود ف العيد
ونلبس اسود من جديد
متأخذنيش يا أمير
ف بلادي سودا العصافير
كان واجب أدهنها قبل ما تيجي مع شيخ اغفر والغفير !
حقك يا سيدنا تشوفها ألوان تلعلط كتير
لكن يا سيدي الأمير ...
بيقولوا إرهابي غفَّل الغفير
وشيخ الغفر والعمدة والوزير
يوم العيد غفلهم كلهم ف نجع حمادي
يوم العيد وقتل ولادي
مش بس قتل ولادي ... يا أمير دا خرَّم أكبادي
متخدش ف بالك يا سيدي الإمير
قبل كدة رد معالي المحافظ الوزير
وقال دا مش إرهابي خطير
لالاء ... دا مجنون حقير
حتى اسألوا الغفير
انشالله براءة ويعيش معالي الوزير !
†
†
†
لا مؤاخذة يا سيدنا الأمير
مفيش مية ... الإرهابي كسر الزير
روحت اشتكيه للوزير
ركبت لغاية مصر
تهت م الفجر للعصر
ولما وصلت القصر
لقيت نفس الغفير
بيحرس قصر الوزير
لقيت الأمر خطير
رجعت نجع حمادي
أندب ولادي وولاد ولادي
ونفسي مكسورة زي الزير
متخدش ف بالك يا سيدي الأمير
مفيش إرهاب ف بلدنا ع رأي المحافظ الوزير
دا واد مجنون حقير
†
†
†
إلا قولِّي يا أمير
هما ليه سموه عيد
إيوة آني عرفت ... عشان بنلبس اسود من جديد !
وكل ما تمسكوا ارهابي ... قصدي مجنون يرووح بيته من جديد
سامحني يا أمير ...
بيدور السؤال ف عبي من جديد
هو مين اللي بعت الإرهابي الأسود لولادي ...
ليلة العيد ف نجع حمادي ؟!
والكشح وغيرها ... عزبة واصف
من يومها وريقي ناشف !
سامحني يا أمير
وقال ايه الإرهابي مخاوي الغفير
اللي على باب قصر الأمير
وقال إيه أخوه في حرس العمدة الكبير !
وقالوا الإرهابي دا يبقي نايب البيه الوزير
المحافظ الكبير !
اللي قاله رووح بيتك ... لما قتل ولادي ف الكشح
سامحني يا أمير الدم فيا شح
مفيش اسم الكشح
ولا حتى ولادي ماتوا ... إسمها دار السلام
دا حتت واد مجنون ... كان بيصطاد حمام !
واسم الكشح بح ... وتعيش دار السلام !
اتدفنت بشر دمها ... ما انتوا دفنتوا إسمها
ربنا يخلي البيه الوزير
والمحافظ والأمير
والعمدة والغفير
مش مهم مية ولا زير
ربنا يخلي البيه الإرهابي
وتعيدوا علينا من جديد
واهو قرَّب العيد يجي من جديد
وبنحضِّر أكفان من جديد
ونلفها بعلم بلدنا السعيد
ومتنسوش هدايا العيد
لبس إسود جديد
يا ترى يا ولاد المجنون الجديد
فين ها يجي من جديد ؟!
ف اسكندرية أو أسوان ف السيل الجديد ؟!
ها يظهر في سينا أو بور سعيد ؟!
أو ف رمسيس ف الباب الحديد ؟!
نتمنى ليكم عيد سعيد
صاحب الرداء الأسود
|
